Craobh 2006

An tAthair Seán Ó Gallchóir

Leath bealaigh fríd an dara leath de chluiche ceannais na peile sinsirí i nDún na nGall ar an 15ú lá de Dheireadh Fómhair 2006 thug Niall Mac Aoidh ruathar éachtach óna chúl féin cois Finne chianaosta suas an pháirc isteach go domhain sa leath a bhí a chosaint ag foireann Naomh Adhamhnáin. Níor tháinig scór as an ruathar, ach ba ráiteas dúshlánach dearfach é, a chur in iúl, cé nach raibh Gaoth Dobhair ag imirt go maith ná a dhath cosúil leis, nach raibh siad cloíte, go raibh an spiorad santach, an croí beo bríomhar ag preabarnaigh go láidir, an toil tréan, cíocras na Craoibhe coimhíoch ina mhéid agus ina dhoimhne.

B'shin mar a bhí feachtas na bliana 2006. Ba mhinic go mba iad an spiorad agus an spreachadh, an t-ocras agus an t-allas, an díograis agus an dúthracht, an croí agus an cíocras, a choinnigh ag dul iad nuair nach raibh an pheil chomh glórmhar is a bhí sí i mbuaidh na bliana 2002. Thoisigh an feachtas Lá Leabhóige ar an Chlochán Liath. Cuimhní na staire ag maisiú na hócaide. Bhí Gaoth Dobhair ní b'fhearr ach is beag a bhí eadartu ar chlár na scór go bhfuair an mionúir condae, Séamus Ó Cearrbhaill, cúl na buaidhe sna bomaití deireanacha. 1-08 / 0-06. Má measadh nach mbeadh sa dara cluiche i Machaire Gathlán ar an 27ú Lúnasa ach buaidh gan stró, fuarthas stró gan bhuaidh. Cé gur imir Caoimhín Ó Casaide, beo slán as Boston, b'iad na Rosantóirí a thug na mórtháispeántaisí, go háirithe Adrian Mac Suibhne na seacht bpointe. Bhain An Clochán Liath 1-11 / 0-08 agus bhí taibhse John O'Donnell le feiceáil ar Ard na gCeapairí. Ba ar an 9ú Meán Fómhair a socraíodh an scéal ar na Croisbhealaigh agus b'iad na seanfhundúirí Stíofán Ó Casaide , sé phointe, agus Séamus Ó Gallachóir , cúig cinn, a rinne an gaisce. 0-15 / 0-10.

Málainn / Ard a'Ratha

Ba ar Mhálainn a thug Gaoth Dobhair aghaidh sa chluiche cheathrú ceannais i bpáirc dheas úr Leitir Ceanainn ar an 16ú Meán Fómhair. Cé go bhfuil dul chun cinn iontach déanta in Inis Eoghain agus cé gur dhúirt Jimmy Mhicí "cuimhnighí ar Charn 1951" is deacair le foirne móra Thír Chonaill éirí ró-bhuartha fán leathinis neamhspleách ó thuaidh. Agus d'fhóbair gur dhíol Gaoth Dobhair go daor as  méid a muiníne. 1-11 / 1-09!

Seacht bpointe ag James.

Thug Gaoth Dobhair aghaidh ar Ard a'Ratha ar lá báistí cois Finne ar an chéad lá de Dheireadh Fómhair. Thoisigh Gaoth Dobhair ar luas lasrach agus bhí 0-07 / 0-01 ann sular mhuscail Ard a'Ratha. Mhuscail a n-imreoirí agus a lucht bainistíochta agus lig siad Breandán Ó Baoill isteach sa ghleo. Dá mbeadh Breandán...........Á, dá mbainfeadh dá Craobhacha Condae!....dá mbeadh an lá le dá....! Ba é Niall Mac Aoidh laoch na himeartha. 0-11 / 0-09.

Naomh Adhamhnáin

Níor imir Gaoth Dobhair go maith sa cheád chluiche sa chluiche ceannais cois Finne ar an 15ú Deireadh Fómhair. Nó bhí dhá cluiche sa chluiche ceannais ar an aon lá amháin! Bhí lámh an uachtair ag Naomh Adhamhnáin ar feadh leathchéad bomaite ach bhí a dtosaithe lochtach. Nó b'fhéidir gur chirte a rá nach dtug tacaithe Ghaoth Dobhair, faoi stiúir Éamoinn éachtaigh Mhic Aoidh, móran suaimhnis daofa. Choinnigh siad leo. Chráigh siad iad. Shnámh siad in éadan an tsrutha le misneach agus le móruchtach. Ag deireadh an chéad chluiche, 53 bomaite de, ní raibh ann ach trí phointe, 0-05 / 0-02.

Ansin, gan mhoill i ndiaidh ruathar Néill, tháinig cúl cáiliúil cinniúnach an Chasaidigh. Cúl a mhairfeas i gcuimhne an phobail fhad is mhairfeas an chaid. Agus, b'fhéidir, ina dhiaidh sin. Cúl na buaidhe. Deir siad go bhfuair Stíofán an ball ó Éamonn, gur thiontaigh agus gur lig urchar uaidh a bhain crith as an eangach agus as gach croí i bPáirc stairiúil Mhic Cumhaill. Dúirt nuachtán go raibh sé scór slat ón chúl. Dúrthas 'tí Mhicí an oíche sin go raibh sé leathchéad. Bhí sé ar chúl chomh maith is a bhain Corn an Dochtúra Mhic Uidhir riamh. Thoisigh an dara cluiche ansin - gaoth inár seolta, cruinneas inár mbróga, lúth inár ngéaga, brí inár mbearta. 1-05 / 0-06.

D'úsáid Déaglán Ó Cnáimhsí agus a chúntóir Mícheál Ó Dochartaigh 21 imreoir sna sé cluichí. Ní cluiche foirne é feasta ach cluiche paineáil. Níor imir Máirtín Ó Colla, a bhí gortuithe sa chluiche ceananis. Ach, rinne sé a chuid féin riomhe sin. Mar a rinne siad seo a shuigh go foighdeach ar an taobhlíne ach na bhfuair aon chluiche.

Fuair Gaoth Dobhair 3-58 sna sé chluichí. Fuair James 1-26 agus Stephen 1-15.

Foireann na buaidhe 2006

Seán Mac Suibhne

Críostóir Mac Pháidín, Niall Mac Aoidh, Seán Mac Gairbheith:

Domhnall Mac Giolla Bhríde, Éámonn Mac Aoidh, Seosamh Ó Dufaigh:

Caoimhín Ó Casaide, Mícheál Mac Eachmharcaigh:

Pádraig Mac Gairbheith, Cornelius Ó Gallachóir, Brian Mac Aoidh:

Tomás Ó Duibhir, Stíofán Ó Casaide (1-01) Séamus Ó Gallachóir (capt) (0-04)

Ionadaithe: (úsaídithe) Rónan Mac Niallais, Seán Ó Duibhir, Ruairí Mac Cumhaill, Colmán Mac Cumhaill, Séamus Ó Cearrbhaill.

Ceithre Chraobh déag ag Gaoth Dobhair anois. Ar cheann an tsluaigh. Solas lae idi muid agus duisín Aodha Ruaidh.